عريس كفر الدوار: أنا مقولتش لصاحب الكوافير يصور وينشر الفيديو.. وهاخد حقي بالقانون
قال الشاب محمد والمعرف إعلاميًا بـ"عريس كفر الدوار": "أنا اتبهدلت، وحياتي اتبهدلت، أنا أول مرة أدخل كوافير ومعرفش يعني إيه تريند أصلا؛ وأنا والعروسة قصة حب وكانت بتفضل تبص عليا من الشباك، إزاي الناس تقول إنها مغصوبة عليا".
وأضاف "محمد" في أول ظهور إعلامي له خلال برنامج "لقاء على الهواء" وتقدمه الإعلامية لقاء سويدان عبر قناة الشمس: "أنا تعبان نفسيا جدا من وقت الشبكة، أنا ولا بقيت بشتغل ولا حتى قادر أبص في عين أبويا؛ والبلد مقلوبة علينا، الناس بتتمر عليا عشان كنت ببوس أيد خطيبتي وبحاول أرضيها".
وأوضح: "هعمل إيه الفلوس اللي معايا خلصت ومكنش معايا فلوس اجيب بدلة وبوكية ورد، أنا اشتريت قميص بـ 175 جنيه ودفعتلها 1500 جنيه للكوافير والفستان ومكنش في مقدرتي أعمل أكتر من كده.. وأنا مش هسيب حقي من عم صبري صاحب الكوافير، أنا مقولتش له صور، أنا هاخد حقي بالقانون".
وتواصلت لقاء أيضا خلال الحلقة مع خطيبة محمد عريس كفر الدوار؛ قالت في مداخلة هاتفية: "أنا بحبه وكل الكلام اللي قاله صح، أنا بس عاوزة أقول للناس سيبونا في حالنا وياريت كل واحد يخليه في حاله".