تحدثت الفنانة رندا البحيري عن تعرضها لمجموعة من المشاكل في مجال عملها، حيث تشكو من تهميشها في أعمال فنية، وفرض ضرائب عليها بشكل تعسفي رغم سدادها المستحقات المطلوبة، كما تواجه تهديدات مستمرة بالحجز على أموالها.
واستنجدت الفنانة راندا البحيري بنقيب المهن التمثيلية وشركة المتحدة للخدمات الإعلامية للتدخل وحل مشكلاتها، وكتبت عبر حسابها الرسمي بموقع التواصل الاجتماعي فيسبوك:"الشركة المتحدة للخدمات الإعلامية، السيد نقيب المهن التمثيلية، تحية طيبة وبعد، هذا ليس بيان شجب ولا شكوى ولا أي شئ آخر".
وأضافت: "كل ما في الأمر عرض موضوعي علي حضراتكم، لقد حوربت بداخل شركات الإنتاج المصرية و تم منعي من العمل بدون إبداء أسباب وبالفعل بعد أكتر من بروفة لأكثر من عمل وأكثر من محاولات لدخولي أعمال فنيه بلاقي نفسي فجأة اتشالت منها ومش فيها والعمل بيكمل من غيري".
وتابعت: "الكلام ده بيحصل بالظبط بقاله أكثر من 7 سنوات و بيحاولوا فيه بقالهم أكثر من 13 سنه بمساعدة أحد الأشخاص خارج المجال الفني، و ليس هذا صلب الموضوع أبداً، أنا بتعرض بقالي أربع سنين دلوقتي لضغط لا يمكن لواحدة ست تقدر تتحمله لوحدها".
null
واستكملت: "أنا مشتكتش ولا خليت شكل الفن والفنانين وحش و التزمت الصمت وبقالي سنين بحاول اشتغل في مشاريع و فيه منها اللي ربنا كرمني فيه وفيه منه اللي علشان عدم خبرتي الكبيرة انذاك أتنصب علي فيه، يعني بسبب أن مفيش عدل في المنظومة أتنصب علي في فلوس كنت شغاله بيها و جايباها ب تعب كبير جدا".
لفتت: كنت طول عمري شخص ماشي صح جدا فيما يخص الأوراق وحق الدولة وضرائبي كلها مدفوعه من ٢٠٠٤ يعني بقالي ٢٠ سنه بدفع للضرائب، وأظن لو أنا شخص مش ماشي صح مع الضرائب كان من زمان هتلاقي حد قال راندا مدفعتش أو معملتش أو كذا و كذا، ومحدش أصلا يقدر يشكك في حبي لبلدي الشديد ووطنيتي و في نزاهتي الحمدلله رب العالمين".
وأشارت: اكتشفت من فتره انهم حاطين عليّ ضرائب جزافية بالرغم من اني مبشتغلش في التمثيل أصلا، وكل ما اكلم حد في المبني بيقولي اصل الممثلين كلهم حصل معاهم كده مش انتِ بس !!! طب أنا بتكلم عن نفسي، اتكلمت مره واتنين وكلمت نقيبي السيد أشرف ذكي، وهو أداني نمرة تليفون الأستاذة مها المختصه عن الممثلين أمام الهيئة العامة للضرائب بحيث أنها تفهمهم و قالي إن الموضوع ده هيخلص، لأن الممثله دي حاليا لا تعمل بالتمثيل، ف مش هينفع اننا ندفعها فلوس قديمة هي أصلا دفعتها قبل كده.
و بالمستندات أنا والمحاسب الضريبي المحترم اللي شغال معايا دفعنا الفلوس اللي علينا من قبل ٢٠٠٥ كل سنه بندفعها في سنتها، انما هم مره واحده عايزينك تدفع ضرائب جزافية هم اللي حسبوها من غير ما يرجعولك واضطريت في المره الأولي نظراً لحبي لبلدي واحترامي لكيان الفنان المصري و عدم اهتزاز صورته أمام المصريين والعرب اني امضي علي رقم كبير جدا مع اني متأكده أن أنا مش المفروض ادفع الكلام ده، علي وعد منهم السيد عمرو حجازي والسيد أحمد عبد الغني، اني هدفع أصل المبلغ ومش هدفع غرامات علي المبلغ ده.
وبالفعل وقفوا غرامات و بقالي كذا سنه بقسط المبلغ ده للضرائب لحد الحمدلله ما خلصته كله، فوجئت بعد ما المبلغ خلص اولاً ب مبني القيمة المضافة بيكلمني عايز يدفعني غرامة بالرغم من انهم وعدوني مفيش غرامات، والغرامه دي أكتر من المبلغ نفسه اللي بقسطة بقالي سنتين، ثم اتصال من كذا مأمور ضرائب عامة، طالبين مني فحص كل سنين العمل اللي اشتغلتها، افحص ٢٠٠٦ اللي ورقها بقي لونه اصفر ؟؟؟؟؟.
وطالبين اني ادفع من ٢٠٠٦ لحد ٢٠٢٤ يعني ١٨ سنه ضرايب أنا دافعاهم أصلا قبل كده، قولتلهم أنا دفعت ده قالولي مينفعش، قولتلهم ايه هو اللي مينفعش، قالولي اصل احنا واخدين تعليمات ان كل الممثلين يدفعوا أزيد من اللي دفعوه، قولتلهم التعليمات دي منين ؟؟ محدش رد.
قالولي كده كده هتدفعي حتي لو دفعتي قبل كده.
مع الضغط عليّ اضطريت اني اعمل جلسات مع الضرايب لحد ما كل الناس هناك بقوا يشوفوني يومياً و بجد فيه ناس تعاطفت جدا مع موضوعي لأنهم بالفعل شايفينني دفعت قبل كده.، إلا مختصة الحجز كل يوم بتكلمني أنا هحجز عليكي.
أنا أول مره أشوف موظف بيتصل ب عميل الساعه ٨ بالليل بعد مواعيد العمل علشان يقوله أنا هحجز عليك، يتم تهديدي يوميا بالحجز علي أموالي، يتم تهديدي يومياً بالضرايب مع اني دفعت كل ضرائبي لحد آخر عمل عملته، يتم تهديدي يوميا بالضرايب مع اني لا اعمل مع المتحده و لا غيرها، السيد نقيب المهن التمثيلية، الساده المسئولين عن الإنتاج في مصر، ارحموا الممثل المصري، ارحمونا، وبجد بجد والله ما بطلب شغل أنا أصلا فقدت الشغف كممثلة وظش عايزه أشوف وش الكاميرا دي تاني، أنا فعلا كل اللي طالباه إنكم تسيبوني في حالي. بس مش اكتر، يا أسيادنا أنا عايزه اكمل حياتي في مصر، مش عايزه أدور علي شغل برا
و لا عايزه أعيش في حته تانيه ليه مصممين تزقونا كلنا ندور علي حياتنا في حته تانيه. أنا قاعده هنا.
