أعربت الفنانة جيهان أنور عن خوفها من ردود الأفعال على قرار ارتدائها الحجاب وتأثير ذلك على مسيرتها الفنية، وقالت: "في البداية خوفت من خبر إعلاني ارتداء الحجاب؛ لأني كنت لسه واخدة القرار جديد ومش جاهزة إني أعلن ومش عارفة هلبس إيه وهستمر فيه ولا لأ، وأعلنت حجابي لما جربت ولقيت نفسي مرتاحة في الزي ده".
وأضافت في تصريحات خاصة لـ" المصير": "نفسيتي كانت وحشة في الفترة دي، وخوفت ليقولوا إن جيهان اعتزلت وبالفعل ده حصل ومواقع صحفية كتير كتبت إني اعتزلت، واحنا عندنا فكرة إن الفنانة اللي بتتحجب بيقولوا أنها بطلت وأنا معتزلتش فكنت خايفة من كدا".
وتابعت: "الفنانة صابرين سوبر ستار ولما قررت أنها تمثل بالباروكة كان في ايديها أن هي تختار أدوار وتظل متواجدة، وأنا شايفة أن مفيش مشكلة أمثل وأنا بالحجاب ولكن كان عندي بعض التخوفات".
وأضافت: "الحجاب مش هيمنعني إني أمثل لأن وأنا بشعري كانت معظم أدواري بالحجاب، وأنا من الفنانات اللي لبسهم ملتزم، وقدمت أدوار محترمة زي الصعيدي أو الفلاحي أو دور الأم"، مضيفة: "زملائي تواصلوا معي بعد ارتداء الحجاب وفيه ناس قالولي اتحجبتي ليه طب والشغل!، وفيه اللي قالي ربنا يثبتك".
الجدير بالذكر أن الفنانة جيهان أنور حضرت حفل زفاف الفنانة فاطمة عادل والمخرج ياسر عطية، ونشرت عبر حسابها على Facebook صورتها بالحجاب وتلقت تعليقات كثيرة من متابعيها.
وكتبت جيهان أنور: "روحت فرح الغالية فاطمة .. والكل سألنى عن اللوك دا وأنا كأي فنانة خايفة تجهر أنها اتحجبت عشان الشغل وكدا وكنت برد رد مايع مافهوش اجزام إني اتحجبت، ودا ما يمنعش إني لسه بمثل لو اتعرض عليا شغل ونفسي أحقق اللي لحد دلوقت ما حققتوش"
