نزار الفارس وعبير صبري
حلت الفنانة عبير صبري ضيفة في حلقة ببرنامج "تابوه" مع الإعلامي العراقي نزار الفارس، والتي عرضت أمس على قناة دجلة، حيث كشفت من خلال اللقاء العديد من التصريحات التي أثارت الجدل عبر وسائل التواصل الاجتماعي.
وتحدثت عبير صبري عن سبب خلعها للحجاب، فقالت: الحجاب صعب والستات هيفهموني، الحجاب جهاد للمرأة الست المحجبة هي ست بتجاهد لأن الفتن كبيرة وأنا ضعفت عن تحمل مسئولية الحجاب".
وأضافت: "قعدت 5 سنين وكنت مبسوطة في الأول وبعدين بدأت حاجات شخصية في حياتي خلتني أحس إني مش قادرة أكمل بالحجاب، فتنة، حسيت إن التزامي بطريقة اللبس بتاعة الحجاب قل بدأت أبقى دلوعة شوية وكان في ضغوط شخصية ومهنية عليا، لأن في الوقت دا كان موضوع الحجاب والشغل بيه مش سهل، قدمت برامج اجتماعية وقتها لكن كان في أزمات مريت بيها خلتني مش قوية إني احتفظ بالحجاب وزعلانة واتمنى أرجعله تاني، وتحية لكل ست ربنا يثبتها لابسه الحجاب ومكملة بيه رغم الصعوبات والفتن".
كما تحدثت عبير صبري في نفس اللقاء عن زواجها من المحامي أيمن التباع، حيث قالت: اتجوزت رسمي في السفارة المصرية في دبي، ومفيش مهر ولا مؤخر وكتبنا في عقد الزواج مصحف ومفيش مؤخر، لأن الناس لما بتسيب بعض مبتكونش الفلوس أهم حاجة، بالعكس لو أنا زعلانة مش هيبقى فارق معايا الفلوس.
وتطرقت عبير صبري بحديثها عن تصريح "أحب أمثل مع آل باتشينو في الجنة"، وقالت: "أحب جدا أمثل في الجنة ونفسي أقف قدام آل باتشينو فيها ومش هبقى فاضية أعمل حاجة من كتر الحاجات الحلوة اللي في الجنة فيكفيني إني أمثل مع آل باتشينو".
ليرد عليها نزار الفارس عما إذا كان آل باتشينو سيدخل الجنة من الأساس لترد قائلة: "الله أعلم إن شاء الله ربنا يدخل كل الناس الجنة، بس أنا بشوف آل باتشينو موهبة عظيمة لن تتكرر".