دافع الإعلامي عمرو أديب عن الفنان أحمد حلمي، بعد تعرضه لهجوم كبير من قبل جمهوره بسبب فيلمه الجديد، الذي أعلن عنه المستشار تركي آل الشيخ رئيس الهيئة العامة للترفية في المملكة العربية السعودية، بسبب قصة الفيلم التي تدور حول نصاب مصري يمارس عمليات السرقة داخل الحرم المكي، حيث اتهمه البعض بأنه يسيء لبلده مصر بهذا الدور.
وظهر الإعلامي عمرو أديب في فيديو عبر حسابه الرسمي على موقع التدوينات القصيرة إكس، وقال فيه: «الدنيا يبان إنها مقلوبة بسبب فيلم النونو لـ أحمد حلمي، لكن الحقيقة هي معدولة وفيه لجان مدسوسة هي اللي شغالة على الموضوع ده وتشيع إنه إهانة للشعب المصري ومصر، وأحنا عارفين إن ده متظبط أغلبه، وفي ناس ولاد حلال غرضهم يدافعوا عن البلد».
وأضاف عمرو أديب: «هو أحمد حلمي ده مش ابنكم واخوكم وصاحبكم وابن مصر وعمل أفلام كتير قبل كدا، انت بتثق في الناس ازاي، وبعدها فجأة تقرر إن احمد حلمي باع بلده وباع دينه وباع حياته مقابل رزمة ريالات؟، ايه كل الكلام ده انتوا ما تعرفوش مين أحمد حلمي».
وتابع أديب:«قبل كدا أحمد حلمي عمل فيلم عسل أسود ونزل لقى البلد فيها سلبيات كتير، ولكن في ناس غرضها ليس الاصطياد في المياه العكرة ولكن غرضها تبوظ البلد وعايزاها مولعة وتعبانة وبتعرج وفيها توتر مهما الدنيا هديت وبقت حلوة ولطيفة، فيه حد غرضه الدنيا تبقى بايظة».
وأكد عمرو أديب على وجود دور النصاب في كل دول العالم، قائلا: «دور النصاب في الفن المصري والسينما المصرية موجود منذ زمن، كما أنه بداخل هذا الفيلم يوجد نصاب سعودي، وكل شعوب العالم يوجد بها نصابون، كل الجنسيات فيها الكويس والوحش».
وأعرب أديب عن استيائه من الهجوم على أحمد حلمي وخاصة قبل عرض الفيلم، قائلًا: «وبعدين احنا بنتكلم على ايه يا جماعة، النائب العام المصري بيحقق مع 16 شركة نصبت على مصريين، وبعدين انت طالع تهاجم قبل ما تشوف الفيلم، وتعرف ايه الحكاية الفيلم لسه بيتكتب وبيتوضب».
وأضاف مؤكدًا أن فيلم ولاد رزق حقق نجاحًا كبيرًا على الرغم من كونهم نصابين، وقال: «ولاد رزق الجزء الثاني والثالث كانوا نصابين وحرامية اشمعنا دلوقتي بقى النصاب ده اللي هيسيء لسمعة مصر».
وأردف: «الفن فيه كل حاجه ودوره مش بس أنه يوري الإنسان الطيب الجميل الكويس لأ دوره يبين المشاكل وتعرف المصابين عاملين ازاي وتاخد دروس».
واختتم عمرو أديب حديثه قائلًا: «يا جماعة ده أحمد حلمي بس الواضح أن فيه ناس التوليفة دي مش عجباه أو التوليفة دي عاملة حساسية نفسية اهدوا شوية واستنوا شوفوا الفيلم وإذا كان الراجل ده باع بلده بشوية ريالات ولا لا وخلوا عندكم ثقة مش كده كفاية وارحمونا شوية».
.jpg)
