وجهت الفنانة شيرين عبدالوهاب رسالة شكر للفنانة اللبنانية هيفاء وهبي، مؤكدة أنها كانت من أوائل الفنانات اللاتي قدمن لها الدعم في أزمتها الأخيرة، معبرة عن سعادتها وامتنانها لمواقفها الداعمة.
كتبت شيرين عبدالوهاب منشورًا عبر حسابها الرسمي على موقع تبادل الصور والفيديوهات "إنستجرام"، قالت فيه: "هيفاء وهبي كانت أكتر واحدة بتتواصل معايا في أزمتي الأخيرة، وكانت بتقولي تعالي اقعدي معايا. أنا رديت على النجمة هيفاء وهبي مش عشان باركت لي على الأغاني، لكن لأنها كانت واقفة جنبي بجد".
كما روت عبدالوهاب مدى مساندة هيفاء وهبي لها في هذه الأزمة، قائلة: "النجمة هيفاء وهبي عملت معايا مواقف جدعة، أقرب الناس ليا ماعملتهاش، علشان نفسيتي تبقى أحسن. كانت بتتواصل معايا يوميًا عند الطبيب، وكانت عاوزة تاخدني أقعد عندها، وتخرجني وتحسن مزاجي، وتدخلني مكان يظبطولي الفيتامينات اللي في جسمي ويخسسوني".
وتابعت شيرين مؤكدة أن هيفاء أثبتت أنها من أوفى الأصدقاء، بل مثل شقيقتها، قائلة: "هيفاء أثبتت إن الصديق الوفي مش لازم يكون جنبك، ممكن يكون بعيد عنك. من أجدع وأنظف وأكرم الناس اللي شفتها في الوسط الفني. هيفاء بموقفها ده اشترتني طول عمري، وهفضل لحد ما أموت ممتنة ليها ولوقفتها معايا في الوقت ده.. الوقت اللي كنت فيه وحيدة وتعبانة ومكتئبة وبعيط، وجت اطمأنت عليا وحسستني إني ليا أخت فعلًا".
واختتمت شيرين حديثها موجهة رسالة شكر لهيفاء وهبي، قائلة: "شكرًا يا هيفاء يا حبيبتي، ويا ريت في مصر لو في مشاكل، أنا بناشد أي حد إن الست دي طيبة جدًا جدًا، وماتستاهلش إلا كل خير".