حسام حبيب : «ارحموني من شيرين عبدالوهاب أنا في سجن وعايز أتحرر منه»

ارحموني من شيرين عبدالوهاب أنا في سجن وعايز أتحرر منه»... بهذه الكلمات أعرب الفنان حسام حبيب عن استيائه لاستمرار تردد إسمه وارتباطه بإسم شيرين عبد الوهاب، مشيرًا إلى أنه لن يعود لها مرة أخرى، نظرًا لأنه تحمل العديد من الإهانات بسبب علاقته بها.

وقال حسام حبيب خلال تصريحات تليفزيونية لبرنامج ET بالعربي: «الموضوع مش بالعافية أنا مش عايز أرجع، وأنا اللي في سجن وعايز أتحرر منه، أنا اللي تعبت واستحملت إهانات بقالى سنين على حاجات محصلتش، وعمري ما اشتكيت ولا اتكلمت ولا دفعت عن نفسي عشان ميطلعش شكلها وحش، بس خلاص كدا أنا فاض بيا، وكل حاجة هتتقال للناس زي ماحصلت بالظبط، أنا عمري ما طلعت أسرار حد بره ولا عمري ماكنت هعمل كده، بس خلاص أنا اضطريت لكده، الحياة مش بالعافية أنا مش عايز أرجعلها، وأنا اللى بستنجد بالناس وبقولهم نجمتكم الكبيرة اللى بتحبوها من سنين كتيرة، عايز أبعد عنها ومش عارف، أتصرف إزاي وأستنجد بمين، وأنا بدعي ربنا قدامكم أهو يارب عايز أبعد عنها يارب ومش عارف أعمل إية، أنا تعبت بجد وسنين من الظلم والإهانة وبسكت ومبردش، وكل الكلام اللي كانت بتقوله غلط كله، هو في حد يكون ضارب حد وفتحله دماغله، ويعتذرله عادي، وقبلها كنت حالق شعرها وتعتذرلي عادي، ويرجعله تاني، هو في حاجة اسمها كدا».

وردًا على اتهامات شيرين بتهديده لها، قال حبيب: «بتقول عشان بهددها! بهددها بإيه دا اللي هي قالته للناس أقوى من أي تهديد، أي اللي عندي أهدده به، وأقول ربنا كبير لحد ما أظبط ورقي وأكلم المحامين بتوعي عشان أعرف أخد حقي ومش هتنازل المرة ديت خالص، وهاخد حقي بالقانون لأني عملت حساب للعشرة أكتر من مرة، وكل مرة بيطلع أكتر من اللى قبله، أيام مكلمة لميس الحديدي وطلعت قالت شتائم وحاجاة في حقي، كفاية كفاية يا ناس».

كما أكد حبيب أن اتهامها له بسرقة خزنتها عار من الصحة، قائلًا: «أنا عايز أعرف إزاي سرقتها، هل دخلت وأنا لابس طاقية الإخفاء، ومحدش شافني، وكل مرة سرقة وكلام أقل بكتير من أني أعلق عليه، كل شوية أنا صرفت وعملت، وأنا بستنجد بكل الناس ارحموني منها، دا ذنب أنا عملته في حياتي أنا مش عارف إية دا، ولسة هطلع أتكلم كمان بكل التفاصيل، ومش بقول كدا عشان خاطر أخوفها، لا دا حقي، عشان كل شوية يتقال كلام عني وعن أهلي، وأنا مش بشكر في نفسي الحمدلله متربي ومن عيلة كويسة جدا، ومتربي في أماكن كويسة ومتعلم في مدارس كويسة جدا، وبعرف ربنا سبحانه وتعالى».

واختتم حديثه قائلًا: «وعايز أقول للناس كلها شيرين عبدالوهاب بتستقوى بيكم، ودائما بتهددني عشان لو معملتش حاجة، تقولي مش هخليك تمشي في الشارع، فأرجوكم بالله عليكم بلاش تمشوا مع حد عايز يظلم حد».