كتبت أسماء مدحت
عبرت لمياء راتب، ابنة الفنان الراحل أحمد راتب، عن حزنها الشديد لفقدان والدها في منشور مؤثر نشرته عبر صفحتها الشخصية على موقع التواصل الاجتماعي "فيسبوك".
وكتبت لمياء راتب: "لما بيسيبك حبيب وواحدة واحدة تبدأ تستوعب بتلاقي نفسك بتسأل يعني خلاص كدة؟ خلاص بجد؟ طيب مفيش حتة أمل صغيرة إنك ترجع؟ طيب ما أنت لسة جوايا..لسة صوتك ف ودني و شكلك محفور ف قلبي..هودي كل دة فين؟ إزاي كل اللي بينا دة مبقاش ليه أي ترجمة في الواقع؟ إزاي اختفيت كدة من كل حاجة؟".
وأضافت: "هفضل مع الحاجات اللي جوايا دي لوحدي ازاي؟
وتابعت" في كتير بيقولوا إنك لسة حاسس بيا وشايفني، طيب شوفتني وأنا بعيط من شوقي ليك؟ شوفتني وأشنا بموت كل يوم على وش الدنيا؟ حسيت برعشة قلبي كل لما أشوف صورتك ؟ وصل لك عجزي لما بضعف و مش بلاقيك؟، طيب لما بنادي عليك بالليل بالدعاء بتسمعني؟ يعني انت عارف غيابك عمل فيا ايه؟".
وذكرت: "أنا بعترف إني عايشة بصدمة من يوم ما أبويا سابني، بتوع الطب بيسموها trauma، بس أنا بسميها كسرة بسميها عجز بسميها شوق ملوش مكان يروحه بسميها ذكريات بتدبح الروح ".
واستكملت: "أنا عايشة وطول الوقت في الخلفية موجود احساسي بالخسارة والنقصان و قلة الحيلة 8 سنين بصحى كل يوم متجدد عندي وجع انك مش موجود، طيب ما أنا نفسي أحضنك قوي يا بابا و محدش عارف يحضنني زيك، إدعي لي من عندك يا حاج، السنين بتمر و روحي بتشيب من غيرك".
