«كل حبايب بابا كانوا حواليه».. ابنة الراحل محمد نصر تنفي غياب نجوم الفن عن جنازة والدها

رحاب عنتر

نفت نادين ابنة الفنان الراحل محمد نصر شائعة غياب نجوم الوسط الفني عن جنازة والدها، مؤكدة انزعاج عائلتها من هذه الشائعة، مشيرة إلى أن ذلك عار تماماً من الصحة.

وأكدت نادين محمد نصر في تصريح خاص ل المصير، أن حبايب والدها كانوا بجانبه في جنازته التي كانت مهيبة، قائلة: "اللي منتشر دلوقتي على السوشيال ميديا كدب وماحصلش حاجة منه، كلام الناس ده وجعنا وضايقنا كفاية كلام عن والدي، افتكروه وادعوا له بالرحمة، لكن بتجيبوا سيرة الناس بالباطل ليه، كل الناس سألت عنه وعننا ومحدش سابنا في اليوم ده ومن وقت مرضه كما، حسوا بينا الإشاعات دي بتوجع قلبنا أوي، كفاية اللي احنا فيه وزعلنا عليه".

وأضافت نادين: "كل حبايب والدي كانوا معانا وجنبنا، بلاش الكلام ده، وقت نزوله القبر قلت له شايف يا بابا انا مسنودة بكل حبايبك زي ما كنت مسنودة بيك في حياتك".

وعن والدها أشارت نادين إلى أن والدها كان أطيب قلب في الدنيا، قائلة: "احنا مش زعلانين من حد زي ما الناس بتقول، لأننا بجد شوفنا حب الناس لبابا بعنينا في جنازته، صلى عليه ناس كتير أوي في مسجد السيدة نفيسة، وشوفنا دعوات الناس ليه من وقت وفاته، قد ايه كان أطيب قلب في الدنيا، ومش هيتعوض كأب وصديق لكل اللي حواليه، وهي دي الحاجة اللي اسعدتنا أوي".

وتابعت ابنة الراحل محمد نصر: "كان انسان جميل ونجم، ولولا مرضه كان أعظم ممثل في الدنيا، وأداءه كان محترف وكل الناس كانت بتحبه، ربنا يرحمه وهو أكيد في مكان أحسن".

وكشفت نادين عن موعد عزاء والدها الراحل محمد نصر،  والمقرر أن يقام اليوم الأحد، وقالت: "أن شاء الله عزاء والدي النهاردة في مسجد النزهة للقوات المسلحة أمام سيتي ستارز قاعة الصفا،  من الساعة 7 مساءً حتى 10، اتمنى تدعوا له بالرحمة وبطلوا تجيبوا في سيرته عشان يكون سعيد ومرتاح".

وأكدت نادين نصر أنهم قاموا بتنفيذ وصية والدها التي أوصاهم بها، بالصلاة عليه صلاة الجنازة في مسجد السيدة نفيسة.