كشفت الفنانة مي عمر عن كواليس دورها في مسلسل علاقة مشروعة قائلة: "كارثة إن يبقى في واحدة على علاقة مع واحد متجوز، وأنا عملت الشخصية دي في مسلسل علاقة مشروعة ومكنتش حباها واترددت في تقديمها، وبكره الشخصية دي جدًا في الحقيقة، وبدأت أحاول أبقى هي عشان أحبها وأعرف هي شايفة نفسها إزاي، ووجهة نظرها إنها بتشوف نفسها مش غلطانة، وإنها هي كمان بتحبه وسايباه مع مراته عادي".
وقالت مي عمر، خلال استضافتها ببرنامج "أسرار" مع الإعلامية أميرة بدر المذاع على قناة النهار: "أنا بشوف إن المفروض الراجل المتجوز خط أحمر، واللي مش مبسوط في حياته يطلق ومفيش حاجة إسمها عشان الأولاد والراجل اللي بيعمل كده بيكدب وبيضحك على نفسه وعلى اللي معاه، واللي مش مبسوط ينفصل، ويدخل في علاقة جديدة بعدها، لكن مع بعض غلط عشان انت بتظلم الاتنين الأولى والتانية".
برنامج "أسرار" تقدمه الإعلامية أميرة بدر على شاشة النهار يومياً خلال شهر رمضان، في تمام الساعة التاسعة والنصف مساءً، تستضيف من خلاله عدد من نجوم الفن والرياضة والسياسة في مصر.
