أوضحت الفنانة عايدة غنيم، بطلة مسلسل عائلة الحاج متولي، عن حقيقة اعتزالها الفن بعد مقتل والدتها، بجانب الكشف عن سبب غيابها عن الساحة الفنية خلال الفترة الماضية.
بعدت عن الفن لأني نفسيًا مش مؤهلة
وقالت عايدة غنيم، في لقائها مع الإعلامية إنجي هشام، في برنامج "المنسي"، المذاع عبر شاشة قناة "هي": أنا معتزلتش الفن، ولكن الصدمة نفسها بتاعة الموقف لما حصل كنت وقتها شغالة مسرح، وفقدت النطق 40 يوم وقعدت في المستشفى الأحبال الصوتية مبتكلمش، وطبيعي أني بعدت لأني نفسيًا مكنتش مؤهلة، وأنا لغاية فترة قريبة مكنتش بتكلم عن قتل والدتي ولا بحب حد يجبلي سيرته".
المخرجين الجداد ميعرفوش حاجة عن الجيل القديم
وتابعت: "أنا فعلًا الفترة الأخيرة دي مشتغلتش كتير في مصر، ولكني اشتغلت برا مصر، وأنا بيصعب عليا جدًا إني مش لاقية نفسي واني أشتغل في تلفزيون بلدي وأشتغل برا، وأنا اتكلمت كتير مع النقابة أني عايزة أشتغل، لأن المخرجين الجداد ميعرفوش حاجة عن الناس القديمة، وهما ميعرفوش عايدة غنيم، وبيستسهلوا وبيجيبوا اللي موجودين دلوقتي".
لم اعتزل الفن.. وقولت للنقابة اني عايزة اشتغل
وأضافت عايدة غنيم: في ناس كتير بيشوفوني، ويقولو إحنا فاكرينك اعتزلتي، لأ يا جماعة أنا معتزلتش ولكن أنا مبعرفش أرفع سماعة تليفون على حد معرفوش وأقول له أنا عايزة أشتغل، ولكن ده ممكن أعمله مع المخرجين اللي اشتغلت معاهم بتصل بيهم في الأعياد، ولكن معظمهم مبيشتغلوش.
موعد برنامج المنسي
برنامج المنسي، من تقديم الإعلامية إنجي هشام على شاشة قنا هي، ويُعرض يوميًا في تمام الساعة العاشرة مساءا، طوال شهر رمضان، ويحل عدد من نجوم الفن ضيوفًا على برنامج المنسي، للحديث عن بداياتهم وتفاصيل مشوارهم وتفاصيل التحديات التي واجهتهم على مدار مشوارهم الفني.
.jpeg)
