أعلنت الفنانة كندة علوش، إصابتها بمرض سرطان الثدي، مؤكدة مساندة زوجها الفنان عمرو يوسف، لها خلال رحلة علاجها من المرض.
وأشارت كندة علوش على حرص عمرو يوسف على استقرار حالتها النفسية، وذلك خلال لقائها في بودكاست الإعلامية منى الشاذلي، وقالت: "عمرو لما عرف إني مصابة بالسرطان كان خايف أكتر مني وقلقان، وهو مش سودوي ولكن كان حاطط الفكرة دي قبلي وكان حاسس، وقررت أنا وعمرو إننا مش هنعرف حد لأننا مش عايزين نقلق الناس، وعمرو كان بيوصلني الجلسات ويقولي إن لازم حد يقعد معايا في المستشفى".
وتابعت علوش: "كنت بخلي عمرو هو اللي يجي معايا كنت عاوزة أمشي الرحلة بنوع من الانغلاق، كان فيه صديقة عزيزة خفت من سنين وقالت لي علشان تخففي جلسات الكيماوي خلي معاكي شلة، جيت أفكر أعمل كده حسيت أني مش قادرة كنت عازوة أخوض الرحلة دي لوحدي، وعمرو مُصر يجي كنا ساعات مش بنتكلم وأنا بقرأ قرآن أو بفكر أو أتامل، كنت عاوزة أشيل مسؤولية نفسي وأنا مركزة."
وأضافت: "عمرو كان داعم قوي جدًا لأنه شخص إيجاب ولا مبيستسلمش للحزن وكل ما يشوفني هقرب يرجعني ومروحش في السكة دي، وهو كان معايا في المستشفى ورحلة العلاج، وكان بيخفف عني ويسمعني وميسبنيش أستغرق في الخوف، وعمرو لما بيكون عنده مشاكل في الشغل مبيجبش المشاكل معاه البيت".
واختتمت حديثها: "أنا شخص أكثر حساسية وميال للحزن، وأنا أخدت منه من بداية ارتباطنا أن إزاي أتعامل مع الأزمات، وأنا مش معتبرة إصابتي بالسرطان أزمة، وبنتعامل معاه بإيجابية".
