كشفت الفنانة القديرة سوسن بدر عن رأيها في زواج المرأة في سن كبير، مؤكدة أن هذا القرار لا يقلل منها كما إنها لا ترغب في إزالة أو تغيير ملامح السنين من وجهها وأنها سعيدة بالخبرة التي اكتسبتها في حياتها.
وجهت سوسن بدر رسالة للسيدات اللاتي يخشين من خطوط وتجاعيد التقدم في السن.. والانتقادات التي يوجهها بعض الرجال للسيدات خلال لقائها مع الإعلامية لميس الحديدي في برنامجها "كلمة أخيرة" والذي يُعرض على قناة ON، وقالت: "يعني الست بتكبر لوحدها وهو مش بيكبر ؟.. ما كلنا بنكبر سوا والمفروض نعقل سوا وننضج سوا الفرق أن الست بتنضج من سن أصغر اسرع من الراجل بيكون وقتها لسه بيلعب كورة في الشارع".
وأضافت بدر: "مش عاوزة الستات لما يكبروا يخافوا او يعتقدوا ان فيهم حاجة نقصت بالعكس ربنا رحيم لو فيه حاجه بتقل او تختلف ده يزدنا فهم وثقة ونضج وعلم".
وتابعت سوسن بدر: "أنا خلاص كنت صغيرة وما صدقت خلصت الفترة دي ومبسوطة أوي بالمرحلة الحالية لأننا كبرنا وفهمنا وعقلنا وبقينا متقبلين الحياة والدنيا، واللي عايز يتجوز يتجوز واللي عايز يعمل حاجة يعملها مادام مش ضد العرف ولا الأخلاق ولا المجتمع أو الدين، ماعيب إلا العيب".
وأردفت: "الناس مش هتبطل كده كده، وأنا صغيرة كنت بخاف للغاية من المجتمع وكنت حريصة جدا بقدر الأمكان أن أظل محافظة على التقاليد والأعراف حتى لو مش مقتنعة بها علشان أهلي وأبويا والمجتمع وولادي لكن مع الوقت عرفت أن التقدم في العمر والسن حرية وبراح وساعتها بنسأل ..ليه كنا بنعمل كل ده ؟ لايصح إلا الصحيح محدش هيفضل طول الوقت عاجب كل الناس ولا كل الناس هتتفق عليه".
وتحدثت أيضًا عن الخبرة والنضج الذي وصلت إليه خلال رحلتها وقالت: "خبرة ونضج وحرية وبراج وسعادة وكل حاجة أنا في منتهي السعادة.. حتى ملامحي بحبها طلعلي خطوط وماله قمر برضه".
