زغرودة

الجمعة 09 مارس 2018 10:55 م
الشاعرة هانم الفضالى
هانم الفضالى
               زغروده
زغروده انطلقت يا ضنايا 
من غير ما أحس
ماهو لما عرفت خبر موتك
ضاع منى الحس
والعلم الملفوف حوالينك
وشوشنى بهمس
ابنك راح ياخدك للجنه 
وبعزة نفس
.........
يا ضنايا ولادك فى عيونى
ومراتك زين
بحكيلهم حكايات طوالى
ماعرفش منين
الفكره بتيجى ورا الفكره
مليانه حنين
وفارسها يا ولاد من صغره
عاشق حطين
............
بيجامتك يا ضنايا مع البدله
حتى الجرافيت
رشاهم بروايح عطرك
الوقت بوقت
وبشوفك رايح لصحابك
قاعد ع النت
وصورتك وانت بتتمخطر
على سطح اليخت
..............
بطلى يا ضنايا من صغرك
بتجبلى حاجاتى
وكبرت بتسقينى دواي
تهدهد اناتى
وف لحظه لقيتك بتقولى
كترت جبهاتى
عن إذنك دبلادى الأولا
أديها حياتى
زغروده انطلقت يا ضنايا 
من غير ما أحس
         شعر / هانم الفضالى